A celebración fai un par de semanas do Día do Libro e a máis recente conmemoración do Día das Letras Galegas fixéronnos botar aínda máis de menos á nosa querida Biblioteis. Por iso, e para tela máis presente ata que poidamos desfrutar dela en persoa, botamos a andar de novo este blog. Lembraremos nel as actividades realizadas ao longo deste curso e darémosvos a coñecer o noso catálogo para ir facendo a boca auga e ir quentando motores para próximas lecturas.
Hoxe recomendamos: Maus
¿Sabías que na biblioteca contamos cunha sección dedicada ao cómic e á novela gráfica? Entre outros títulos emblemáticos deste xénero, atopamos Maus, unha novela gráfica escrita e debuxada por Art Spiegelman, gañadora do prestixioso premio Pulitzer. Trátase dunha verdadeira xoia que conta o Holocausto a través da historia real do pai do autor, un xudeu polaco, supervivente do campo de concentración de Auschwitz. Unha historia desgarradora e impactante, que atrapa ao lector desde o principio. Conta as desconfianzas, traizóns, os campos de concentración, a barbarie, todo isto unido ás reflexións sobre o que foi necesario para sobrevivir dun supervivente do maior centro de exterminio do nazismo. Se che gusta a novela gráfica ou se aínda non te atreviches con este tipo de xénero, non deixes de ler Maus, de seguro, non te deixará indiferente.
Comentarios